Vilja láta kanna áhrif nagladekkja á heilsu

Umhverfisráð Reykjavíkurborgar vill láta kanna kostnað vegna óþrifa af tjöruaustri og heilsuspillandi áhrifa svifryks af völdum nagladekkja. Þetta kemur fram í ályktun sem samþykkt var í dag.

Þar segir að kostnaður samfélagsins af notkun nagladekkja í borginni sé umtalsverður. Augljósastur sé kostnaðurinn við að bæta slit á götum borgarinnar. „Annar kostnaður til dæmis vegna óþrifa af tjöruaustri og heilsuspillandi áhrifa svifryks af völdum nagladekkja hefur hins vegar ekki verið rannsakaður. Umhverfisráði þykir brýnt að það verði gert, einkum til að þessar upplýsingar liggi fyrir og séu almenningi aðgengilegar en ekki síður til að hægt verði að ákveða gjald á notkun nagladekkja í anda mengunarbótareglunnar ef þörf verður talin á," segir í ályktun umhverfisráðs.