Stærsta hvalaskoðunarfyrirtæki á landinu verður til

Slagnum um ferðamennina er lokið við Reykjavíkurhöfn. Hvalaskoðunarfyrirtækin tvö sem hafa verið starfrækt við Ægisgarð, undanfarin ár hafa verið sameinuð. Nýja hvalaskoðunarfyrirtækið verður það stærsta á landinu þar sem samanlagður farþegafjöldi fyrirtækjanna var um 50 þúsund á síðasta ári.

Áfram verður gert út í hvalaskoðun á sömu skipunum Hafsúlunni og Eldingu, ásamt smærri bátunum Gesti og Eldingu II sem aðallega hafa farið í sjóstangveiði og smærri ferðir. Áfram verður starfrækt fræðslu- og upplýsingasetur sem er í gömlu loðnuskipi við Ægisgarð.

Sameinað fyrirtæki mun bjóða uppá ýmiskonar afþreyingu á sjó frá Reykjavíkurhöfn s.s hvalaskoðun, sjóstangaveiði, fuglaskoðun og aðrar skemmtisiglingar. Viðskiptavinir fyrirtækjanna hafa að mestu leiti verið erlendir ferðamenn en íslendingum hefur farið fjölgandi á hverju ári.

Nýtt hvalaskoðunar fyrirtæki mun sækja um fulla umhverfisvottun hjá Green Globe í vor en mikil vinna hefur verið lögð í það ferli síðastliðið ár. Fyrirtækið verður þá með fyrstu hvalakoðunarfyrirtækjunum í heiminum að öðlast þá vottun.