Litla-Ellý fædd

„Litla Ellý fæddist í gærkvöldi klukkan 19:36. 13 merkur og 51 cm. Allt gekk eins og í sögu og við vorum komin heim skömmu eftir miðnæti. Með kveðju, Freyr, Ellý og börn," skrifaði stolt móðir, Ellý Ármanns, til vina og vandamanna í gærmorgun.

Hún og dagskrárstjórinn Freyr Einarsson eignuðust sitt fyrsta barn saman um svipað leyti og Eiríkur Hauksson steig á sviðið á fimmtudagskvöldinu. Fréttablaðið reyndi að ná sambandi við hina nýbökuðu foreldra en ekki reyndist unnt að ná í þau. Samkvæmt heimildum Fréttablaðsins ríkir þó mikil gleði og hamingja á heimili þeirra í Hlíðunum.

Ellý varð nýlega vinsælasti bloggari landsins og lét sig ekki muna um að setja inn nýja færslu í gær, undir heitinu „Ég get alveg sætt mig við trúðanefið og indíánafjaðrirnar en nú er þetta farið út fyrir öll velsæmismörk," sagði hún uppspennt...". Í viðtali við Sirkus, fylgirit Fréttablaðsins á föstudaginn, sagðist Ellý ætla að fylla heimilið af börnum.

Og er óhætt að segja að Ellý sé komin vel á veg með það takmark sitt því fyrir eru fjögur börn á heimilinu; Ellý á tvo stráka af fyrra sambandi en Freyr á tvær stelpur fyrir. „Það er ekki að ástæðualausu að ég valdi Frey. Við erum samstíga í þessu og viljum bæði eiga stóra samheldna fjölskyldu," sagði Ellý við Sirkus.