Ekkert lát á skemmdarverkum á strætóskýlum

Rúður í tuttugu strætóskýlum víða um borgina hafa verið mölbrotnar undanfarinn mánuð og veggjakrot á skýlum hefur aldrei verið meira. Tjónið hleypur á milljónum króna. Flest strætóskýli hafa verið skemmd í Hlíðarhverfinu.

Skemmdarverk á strætóskýlum borgarinnar hafa aldrei verið meiri. Um fimmtíu rúður í skýlum hafa verið brotnar á mánaðartímabili. Lögregla leitaði í nótt tveggja ungra manna sem unnu skemmdarverk á strætisvagnaskýli við Grensásveg en fann þá ekki.

Einar Hermannsson framkvæmdastjóri AFA sem rekur um 130 strætóskýli borgarinnar, segir 13-14 ára pilta vera þarna á ferðinni. Tjónið sem orðið hafi á rúmum mánuði nemi hátt í þremur milljónum króna.

Fyrirtækið standi einnig ráðþrota gagnvart veggjakroti sem hafi færst í vöxt á þessu ári. Milljónir á ári fara í það að þrífa og mála krotið af. Einar segir eftirlit hafa verið hert á síðustu vikum og þá hafi dregið úr skemmdarverkunum.

Tveir piltar um fjórtán ára aldur voru staðnir að verki við strætóskýli í Hafnarfirði fyrir skömmu. Þeir voru færðir til lögreglu og verða að öllum líkindum krafnir um skaðabætur.

Fyrirtækið AFA er alþjóðlegt fyrirtæki og starfar í 3600 borgum um allan heim. Einar segir að Reykjavík og nágrenni sé yfirleitt með lægstu tíðni skemmdarverka.