Í hóp með Borat og Silvíu Nótt

„Mikil endalaus andskotans ládeyða ríkir á öldum ljósvakans hér á landi. Er virkilega enginn sem leggur í þessar öldur? Fyrir utan gömlu og góðu Gufuna er fátt að hlusta á, nema ef til vill Útvarp Sögu.“ Svona hefst síðasta bloggfærsla hins geðstirða Georgs Bjarnfreðarson sem vaknar til lífsins á skjám landsmanna þegar sjónvarpsþátturinn Næturvaktin hefur göngu sína. „Georg er til,“ segir Jón Gnarr, skapari persónunnar en hann leikur aðalhlutverkið í þáttunum ásamt Pétri Jóhanni Sigfússyni og Jörundi Ragnarssyni. „Ég hef samt aðallega notað bloggið til að koma mér í karakter, færa mig nær þessum manni sem ég er reyndar komin með hálfgert ógeð af,“ bætir Jón við.

Ef marka má bloggsíðuna www.georgbjarnfredarson.blogspot.com er starfsmaðurinn á bensínstöðinni ekkert sérstaklega spennandi náungi, Þegar rennt er niður síðuna má sjá myndir af „fjölskyldumeðlimum“ hans sem flestir líta út fyrir að vera frekar á skjön við samfélagið. Jón útilokar þó ekki að Georg eigi eftir að öðlast sjálfstætt líf á netinu líkt og sjónvarpsmaðurinn Borat eða poppstjarnan Silvía Nótt. „Þá getur maður auðvitað sagt bara hvað sem er án þess að taka ábyrgð á því sjálfur.“

Jón lagði mikið á sig fyrir hlutverkið, safnaði myndarlegu skeggi og lét raka á sig skalla sem hann er í óða önn að safna hári yfir. „Já, þessu er sem betur fer lokið,“ segir Jón en tökum lauk aðfaranótt fimmtudags „Og nú bíð ég bara spenntur eftir að sjá afraksturinn,“ bætir hann við en ekki er ljóst hvenær þátturinn fer í loftið.