Eftirlit með fjárveitingum eflt

Félagsmálaráðherra segir innra eftirlit með fjárveitingum verða eflt í kjölfar skýrslu Ríkisendurskoðunar um Byrgið. Úttektin nær einungis til áranna 2005 og 2006, en opinberar fjárveitingar til Byrgisins hófust hins vegar árið 1999 og hljóða upp á tæpar 200 milljónir króna. Ætla má að einnig kannað verði hvað varð um þá fjármuni.

Síðdegis boðaði félagsmálaráðherra blaðamenn á sinn fund um greinargerð ríkisendurskoðunar sem sýnir að tugmilljóna króna fjárframlög til Byrgisins úr sameiginlegum sjóðum landsmanna, hafi hreinlega horfið. Aðspurður hver bæri ábyrgðina hjá hinu opinbera í málinu sagði ráðherra að Byrgið hefði þegið styrkveitingar úr ríkissjóði í gegnum félagsmálaráðuneytið. Eftirlitið væri á ábyrgð ýmissa aðila, meðal annars ráðuneytisins. Hann sagðist ekki geta sagt til um hvort einhver verði kallaður til ábyrgðar vegna málsins, en það hafi orðið til þess að fjallað hafi verið um innra eftirlit hjá ráðuneytinu og starfsmenn þess meðal annars fundað með ríkisendurskoðanda. Ekki hefði tíðkast að fara ofan í saumana á hverri styrkveitingu hjá ráðuneytinu en nú verði eftirlitið eflt.

Fram kom á fundi félagsmálaráðherra að ráðuneytið hefði rætt við velferðarsvið Reykjavíkurborgar og Samhjálp um úrræði fyrir þann hóp sem hefur leitað til Byrgisins. Þá sé landlæknisembættiðreiðubúið að hafa milligöngu um að útvega lækna til að sinna almennum læknisstörfum sem umræddur hópur kann að þarfnast.