Linnulausar maraþonræður um RÚV-frumvarpið

Þingsalurinn er nánast galtómur meðan löngu ræðurnar eru fluttar. Mörður Árnason talaði í þrjár klukkustundir í gær og sömuleiðis Kolbrún Halldórsdóttir. Fjórir aðrir stjórnarandstöðuþingmenn hafa í gærkvöldi og í dag talað í eina til eina og hálfa klukkustund hver.

Össur Skarphéðinsson, þingflokksformaður Samfylkingarinnar, neitar því að þetta sé málþóf en segir að það sem fyrir þeim vaki sé að koma sjónarmiðum sínum vel og tryggilega á framfæri og að fá skýr svör við nýjum upplýsingum sem bendi til þess að samþykkt frumvarpsins geti haft afdrifarík áhrif á fjárhag Ríkisútvarpsins. Þau svör hafi ekki fengist. Mörður Árnason líkti því í morgun við hernaðarástand að öðrum þingstörfum hefði verið vikið til hliðar. Eins konar herlög hefðu verið á sett á Alþingi til að keyra Ríkisútvarpsfrumvarpið í gegn. Sólveig Pétursdóttir, forseti Alþingis, segir að því hafi verið lýst yfir þegar þingi var slitið fyrir jól að það yrði bara eitt þingmál á dagskrá, frumvarp um Ríkisútvarpið, og þessvegna sé það eina málið á dagskrá.

Spurður hve lengi stjórnarandstaðan ætli að tala í málinu segir Össur að það verði gert þangað til sjónarmiðum hennar hafi verið komið vel og tryggilega á framfæri. Össur segir þetta málefnanleg átök. Það sé mjög lítil sannfæring af hálfu ríkisstjórnarliðsins. Fyrst og fremst einn ráðherra hangi á þessu máli. Um málið yrði auðvelt að ná sátt en stjórnarliðið vilji ekki einu sinni tala við stjórnarandstöðuna þó svo að hún hafi boðið upp á það.

Sólveig Pétursdóttir segir stefnt að kvöld- og morgunfundum næstu daga og ekki verði hætt fyrr en umræðu sé lokið. Fyrr sé ekki hægt að fara í atkvæðagreiðslu.