Snorri Sturluson með stirt netsamband og lélegt sjónvarp

Reykholt í Borgarfirði og þar með Snorrastofa búa við hægfara, stirt og brothætt net-samband um svokallað Emax eða eldra kerfi Símans og sjónvarssendingum um örbylgju eða þráð er útilokað að ná þar á bæ, að því er fram kemur í bréfi, sem Bergur Þorgeirsson, fostöðumaður Snorrastofu og Sr. Geir Waage, sóknarprestur í Reykholti hafa skrifað og birt er í Skessuhorni. Þar skora þeir, og þriðji bréfritari, Óskar Guðmundsson, íbúi og rithöfundur í Reykholti á þingmenn kjördæmisins að taka á málinu.

Þeir segja ríkisstjórn lengi hafa lofað jafnræði á þessu sviði, en fyrirtæki stofnanir og heimili á svæðinu sé orðin langþreytt á því að bíða eftir efndum stjórnvalda.

"Við rekstur menningarstofnana eins og Snorrastofu í Reykholti, sem og hótelsins þar og ferðaþjónustu á staðnum, er afar mikilvægt að fjarskipti séu í sæmilegu lagi, þannig að hægt sé að hafa greið og góð netsamskipti við stofnanir og einstaklinga. Nútíma atvinnustarfsemi byggist á sívaxandi hátt einmitt á slíkum samskiptum. Reyndar á hið sama við um rekstur nútíma heimila; það þykja vera sjálfsögð réttindi að hafa aðgang að sjónvarpsstöðvum og ADSL tölvu-tengingum, " segir í bréfi þremenningana.

Eitt af markmiðum Snorrastofu er að gera Reykholt að miðstöð kynningar á íslenskum bókmenntum og miðaldasagnfræði. Í því felst miðlun menningararfsins á víðum grundvelli og er stefnt að stofnun minjagarðs í Reykholti þar sem hugað verður að miðlun fornminja, sögu og menningar svæðisins í heild, að því er fram kemur á vef Snorrastofu.

Í bréfinu í Skessuhorni segir ennfremur að ástandið sé þeim mun dapurlegra sem flestar tæknilegar forsendur séu fyrir hendi til að kippa þessu í liðinn. Árið 2001 hafi verið lagður ljósleiðari hingað um hlaðið sem legið hafi ónotaður síðan. "Þessu mætti líkja við að lögð hafi verið tvöföld hraðbraut við hlið troðninganna, en það væri bara bannað að nota hana," segir í bréfinu "Það er okkur óskiljanlegt að lagt hafi verið í þessa fjárfestingu ef ekki ætti að nýta hana til neins."

Í Fjarskiptaáætlun Samgönguráðuneytsins fyrir 2005-2010 er gert ráð fyrir að allir landsmenn sem þess óska hafi aðgang að háhraðatengingu árið 2007 og að stafrænt gagnvirkt sjónvarp nái til 99,9% landsmanna árið 2007.