Innlent

Boðar skýrslu vegna barnaníðings

Björn Bjarnason dómsmálaráðherra boðaði í dag að skýrsla yrði unnin um það hvers vegna dæmdur barnaníðingur, sem enn afplánar dóm, gat sett sig í samband við þrettán ára stúlku í kynferðislegum tilgangi eins og greint var frá í fréttaskýringarþættinum Kompási á Stöð 2 í gær.

Það var Björgvin G. Sigurðsson, þingmaður Samfylkingarinnar, sem tók málið upp í óundirbúnum fyrirspurnum á Alþingi í dag. Vakti hann athygli á því að maður sem dæmdur hefði verið til langrar fangelsisivistar vegna grófra brota gegn drengjum og úrskurðaður með barnagirnd á háu stigi hefði geta sett sig í samband við unga stúlku sem var tálbeita Kompáss.

Maðurinn hefði dvalið á Vernd, áfangaheimili fyrir fanga sem væru að ljúka afplánun, og hefði reynt að hitta stúlkuna úr skjóli Verndar. Spurði hann hvernig maðurinn hefði getað veri'ð eftirlitslaus á stofnun tveimur og hálfu ári eftir svo þungan dóm. Sagði hann þetta alvarlega brotalöm í kerfinu og spurði dómsmálaráðherra hvor til stæði að endurskoða úrræði fyrir glæpamenn sem þessa.

Björn Bjarnason dómsmálaráðherra sagði mörg álitaefni í málinu sem yrði að skoða og að líkindum yrði unnin skýrsla um málið. Þá benti hann enn fremur á að endurskoðun kynferðisbrotakafla almennra hegningarlaga væri nú fyrir Alþingi.

Mest lesið


Fleiri fréttir

Sjá meira


×

Mest lesið