Upptaka evrunnar ekki raunverulegur kostur

Upptaka evrunnar og innganga í Evrópusambandið er ekki raunverulegur kostur og nýtur ekki stuðnings að mati Geirs H. Haarde, forsætisráðherra. Þetta kom fram í máli hans í utandagskrárumræðu á Alþingi í dag.

Rætt var um stýrvexti seðlabankans og stjórn efnahagsmála í utandagskrárumræðu á Alþingi í dag.

Guðni Ágústsson, formaður Framsóknarflokksins, sagði nauðsynlegt að draga úr þenslu í efnhagslífinu. Varaði hann við vaxandi verðbólgu og kallaði eftir þjóðarsátt um að finna leiðir til að koma á efnhagslegum stöðugleika.

Geir H. Haarde, forsætisráðherra, sagði ljóst að peningastjórnunarkerfið hefði gefið góða raun síðan það var tekið upp. Sagði hann fáa vilja hverfa aftur til þess kerfis þegar ríkisstjórnin tók allar ákvarðanir í vaxtamálum.Sagði hann að eini kosturinn frá þessu kerfi væri innganga í Evrópusambandið og upptaka evrunnar. Sá kostur væri hins vegar ekki raunverulegur og nyti þar að auki lítils stuðnings. Þá sagðist ráðherra telja að nýjasta stýrivaxtaákvörðun Seðlabankans hafi ekki verið heppileg með tilliti til komandi kjarasamninga.

Ingibjörg Sólrún Gísladóttir, utanríkisráðherra, sagði stýrivaxtahækkun Seðlabankans hafa komið á óvart. Þá sagði hún ýmislegt benda til þess að þenslan fari minnkandi.