Meirihluti vill nýta jarðvarma fremur en fallvötn

Tveir af hverjum þremur telja æskilegra að nýta jarðvarma en fallvötn samkvæmt könnun sem Capacent Gallup gerði fyrir Orkuveitu Reykjavíkur um síðustu mánaðamót.

Í könnuninni var boðið upp á fjóra kosti, það er hvort æskilegra væri að nýta jarðvarma, virkja fallvötn, báðar leiðir væru jafn æskilegar eða báðar jafn óæskilegar.

Tæp 66 prósent sögðu jarðvarmann æskilegri, tæpur fjórðungur nefndi báðar leiðir, rúm níu prósent sögðu virkjun fallvatna æskilegri og 0,3 prósent töldu báða kosti jafn óæskilega.

Þegar þessar niðurstöður eru bornar saman við sams konar könnun fyrir ári kemur í ljós að mest hefur fjölgað í hópi þeirra sem vilja nýta jarðvarmann fremur en fallvötn, eða um 17 prósentustig. Það fækkar hins vegar mest í þeim hópi sem telur báðar leiðir jafn æskilegar.

Um 1300 manns voru í úrtaki könnunarinnar og var svarhlutfall 61 prósent.