Menntamálaráðherra staðfestir milljónalaun útvarpsstjóra

Þorgerður Katrín Gunnarsdóttir menntamálaráðherra staðfesti í fyrirspurnartíma á Alþingi í dag að laun Páls Magnússonar útvarpsttjóra hefðu nær tvöfaldast með þeim skipulagsbreytingum sem gerðar hefðu verið á Ríkisútvarpinu fyrr á árinu. Þá var Ríkisútvarpið gert að opinberu hlutafélagi.

Það var Árni Þór Sigurðsson, þingmaður Vinstri - grænna, sem spurði ráðherra út í launakjör útvarpsstjóra og æðstu stjórnenda stofnunarinnar. Vísaði hann í fréttir af launahækkunum útvarpsstjórans og þeirra orða starfsmanna RÚV að launahækkunin boðaði gott fyrir starfsmenn í komandi kjaraviðræðum.

Sagði Árni að ef rétt reyndist væri hækkun launa útvarpsstjóra sérkennilegt innlegg í launaumræðuna í samfélaginu, sérstaklega í ljósi komandi kjarasamninga. Sagði hann það ábyrgðaratriði þegar opinberir aðilar gengju á undan með ákvörðunum af þessum toga og því beindi hann nokkrum spurningum til ráðherra.

Þorgerður Katrín svaraði því til að heildarlaun Páls væru nú 1530 þúsund krónur á mánuði. Þar væru reiknuð inn bifreiðahlunnindi og þóknun fyrir lestur. Útvarpsstjóri hefði hins vegar fengið 780 þúsund krónur í laun á mánuði fyrir ári.

Árni spurði einnig um laun stjórnarmanna RÚV og sagði Þorgerður að þau yrði að ákveða á aðalfundi eða hluthafafundi sem enn hefði ekki farið fram. Þóknun til stjórnarmanna fyrir ári hefði verið 36 þúsund krónur en 65 þúsund krónur til formanns stjórnar.

Launakostnaður almennra starfsmanna ekki breyst eins og útvarpsstjóra

Enn fremur var spurt hvernig kostnaður við yfirstjórn RÚV hefði breyst við ohf-væðingu Ríkisútvarpsins. Sagði Þorgerður Katrín að nokkur stjórnunarsvið hefðu verið sameinuð og stjórnendum hefði verið fækkað úr 16 í tíu. Þetta hefði leitt til þess að launakostnaður við yfirstjórn hefði lækkað um 13 milljónir á ársgrundvelli, úr 137 milljónum króna í 124 milljónir. Þegar tekið væri tillit til vísitölu væri raunlækkunin meiri, eða 24 milljónir króna.

Árni Þór spurði enn fremur hvort launakostnaður almennra starfsmanna hefði breyst hlutfallslega eins og launakostnaður útvarpsstjóra en því svaraði ráðherra neitandi og benti á að fyrstu samningar væru ekki lausir fyrr en um áramót.

Árni Þór sagði ráðherra staðfesta að laun útvarpsstjóra hefðu hækkað á bilinu 90-100 prósent með því að stofnunin hefði verið gert að opinberu hlutafélagi. Það hlyti að vekja upp spurningar um breytingar af þessum toga hjá ríkinu og hvort slíkar breytinga þýddu að menn hefðu almennt frjálsari hendur með að ákveða launakjör. Þetta hefði ekki endilega verið það sem vakti fyrir mönnum með því að breyta rekstrarfyrirkomulagi RÚV. Sagði hann laun útvarpsstjóra hafa hækkað langt umfram það sem gengi og gerðist á almennum vinnumarkaði.

Þorgerður Katrín svaraði því til að það hefði blasað við þegar breytingar hefðu verið gerðar á rekstri Ríkisútvarpsins að það yrðu breytingar á launakjörum. Hún teldi hins vegar mikilvægt að launakostnaður yfirstjórnar hefði hækkað og sagði þá fjármuni sem sparast myndu fara í innlenda dagskrá sem hefði eflst og myndi eflast enn frekar hjá Ríkisútvarpinu.