Fræðsluyfirvöld sendi skýr skilaboð til foreldra í illviðrum

Samtökin Heimili og skóli beina þeim tilmælum til fræðsluyfirvalda í hverju sveitarfélagi að þau sendi skýr skilaboð til foreldra um að þeir haldi börnum sínum heima þegar von er á ofsaveðri eins og geisað hefur í dag.

Samtökin segjast hafa fengið fjölda símtala frá foreldrum sem eru ósáttir við að þegar börnin eru á annað borð komin í skólann fái þeir skilaboð um að sækja börnin í skólann við fyrsta tækifæri. Segja Heimili og skóli að skynsamlegra sé að fræðslufyrvöld taki ákvarðanir í málinu í stað þess að einstakir skólar geri það og börnin sjálf séu að hringja heim og biðja um að vera sótt. Dæmi séu um að þau hafi farið ein heim án vitundar foreldra.

Lögreglan hafi mælst til þess að nemendur séu ekki sendir í skólann í dag og Almannavarnir gefið út viðvörun og ástæða sé til þess að taka slíkar tilkynningar alvarlega og halda börnunum heima. Mikilvægt sé hins vegar að skilaboðin séu skýr og afdráttarlaus.