Um 300 björgunarsveitarmenn að störfum í illviðri

Um 300 björgunarsveitarmenn eru nú að störfum á höfuðborgarsvæðinu og Vesturlandi eftir því sem segir í tilkynningu frá Samhæfingarstöðinni í Skógarhlíð.

Um 120 útköll hafa borist á höfuðborgarsvæðinu, 15 á Akranesi, 25 á Suðurnesjum auk þess sem sveitir hafa sinnt verkefnum víða á Suðurlandi, Suðvesturlandi og Norðvesturlandi. Beiðnum um aðstoð fer fjölgandi á Vesturlandi að sögn almannavarna.

Annríki er einnig mikið hjá lögreglu, slökkviliði og öðrum viðbragðsaðilum á Suður- og Vesturlandi.

Samkvæmt upplýsingum frá Veðurstofu er vindur að snúast í suðlægari áttir og er veður aðeins að ganga niður undir Hafnarfjalli. Hins vegar er að hvessa á Breiðafirði, Vestfjörðum og á Ströndum. Á Holtavörðuheiði fer vindur yfir 30 metra á sekúndu í hviðum og á Kjalarnesi hefur vindur farið yfir 34 metra í hviðum.

Á heildina litið er enn mjög hvasst á öllu Suður- og Vesturlandi og er að hvessa á Norðurlandi. Veðurstofan reiknar ekki með að veður gangi niður á Suður- og Vesturlandi fyrr en með kvöldinu.