Torfusamtökin fagna hugmyndum um uppbyggingu við Lækjartorg

Verðlaunatillaga um byggingu svæðisins umhverfis Lækjartorg gefur mikilvægt fordæmi um hvernig standa megi að uppbyggingu í miðbæ Reykjavíkur í sátt við umhverfi og sögu. Þetta kemur fram í yfirlýsingu Torfusamtakanna. Samtökin fagna þeirri ákvörðun borgaryfirvalda að verðlaunatillagan verði grundvöllur nýs deiliskipulags á svæðinu.

Í yfirlýsingu Torfusamtakanna kemur fram að með hugmyndasamkeppninni hafi Reykjavíkurborg stigið jákvætt skref í átt til þess að lífga miðborgina. Þá segir ennfremur að tillagan sanni að hægt sé að flétta saman húsagerðararfi fyrri tíðar og nútímaarkitektúr í sannfærandi heild.