Vá fyrir dyrum ef tengsl skóla og kristins menningararfs slitna

Slitni tengsl skóla og hins kristna menningararfs er vá fyrir dyrum, sagði Björn Bjarnason dóms- og kirkjumálaráðherra í utandagskrárumræðu á Alþingi í dag um stöðu þjóðkirkju, kristni og kristnifræðslu.

Það var Guðni Ágústsson, formaður Framsóknarflokksins, sem var málshefjandi og vakti athygli á því að í nýjum grunnskólalögum væri búið að taka út ákvæði um að skólastarf mótaðist af kristilegu siðgæði. Sagðist hann vilja kristni nyti vafans og að málinu yrði frestað meðan það yrði rætt betur á öllum sviðum samfélagsins.

Björn Bjarnason dóms- og kirkjumálaráðherra sagði að málið hefði verið honum hugleikið bæði sem menntamálaráðherra og dóms- og kirkjumálaráðherra. Hann hefði áður bent á að íslenskir skólar hefðu vaxið úr jarðvegi kirkjunnar og slitnuðu tengsl skóla og hins kristna menningarfs væri vá fyrir dyrum.

Ráðherra vitnaði til bréfs biskups til Siðmenntar á dögunum þar sem fram hefði komið að lögð yrði áhersla á kristni og trúarbragðafræðslu í skólum á faglegum grunni. Hann tæki heils hugar undir orð biskups. Sagði hann að það yrði íslensku þjóðinni til varanlegs tjóns ef hætt yrði að leggja rækt við hinn kristna arf.

Björn benti hins vegar á að í nýju frumvarpi fælist ekki andstaða við kristin boðskap. Þá sagðist hann ekki hafa komið að gerð hins nýja lagafrumvarps og við þeirri spurningu Guðna Ágústssonar hvort hann hygðist beita sér fyrir frestun málsins sagði ráðherra að það myndi hann ekki gera. Hann sagði að Alþingi hefði aldrei brugðist hinum kristna málstað.

Ögmundur Jónasson, þingflokksformaður Vinstri - grænna, benti á að hér væri sterkt samband á milli ríkis og kirkju en jafnframt gilti trúfrelsi. Vinstri - græn legðu mesta áherslu á að stuðla að virðingu og gagnkvæmum skilningi trúarhópa og að fræðsla um trúmál og heimspeki yrði efld í skólum.

Gera verður greinarmun á trúboði og fræðslu

Fjölmargir þingmenn tóku til máls og vildu flestir þeirra að ekki yrði vikið frá kristnu siðgæði í skólastarfi. Hins vegar yrði að gæta þess að trúfrelsi ríkti í landinu. Bent var á að 82 prósent þjóðarinnar væru í Þjóðkirkjunni og því væri fráleitt að vísa kristninni úr skólum þegar hún hefði svo sterka stöðu.

Þorgerður Katrín Gunnarsdóttir menntamálaráðherra sagði nefndina sem unnið hefði að endurskoðun grunnskólalaga hafa gert sér grein fyrir að breytingin sem um ræddi væri umdeild. Samráð hefði verið haft við Þjóðkirkjuna, guðfræðideild Háskóla Íslands og umboðsmann barna og horft hefði verið til ákvarðana Mannréttindadómstóls Evrópu. Ekki hefði verið stætt á öðru en að gera breytingu á þennan veg.

Hins vegar væri síður en svo verið að úthýsa kristninni úr skólunum. Kristin fræði gegndu mikilvægu hlutverki í aðalnámskrá og vandséð væri hvernig ungt fólk ætti að öðlast skilning á samfélaginu án skírskotunar til kristninnar. Hins vegar yrði að gera greinarmun á trúboði og fræðslu og það væri til að mynda hlutverk kirkjunnar að sjá um fermingarfræðslu barna.