Varar við uppskiptingu Landsvirkjunar í tvö fyrirtæki

Fram hefur komið í fréttum að stofnað verði nýtt fyrirtæki, Landsvirkjun Power ehf., sem meðal annars á að sinna útrásarverkefnum. Sérstakur forstjóri verður settur yfir fyrirtækið og fyrirtækið klofið í tvennt að mati vinstri - grænna.

Telur flokkurinn að með þessu sé verið að færa hluta af umsvifum Landsvirkjunar, ákvarðanir og verkefni, fjær eigendum, þ.e.a.s. almenningi. Aðhald og eftirlit kjörinna fulltrúa virðist með þessu verða takmarkað enn frekar en áður jafnvel þótt í hlut eigi einokunarrisi íslensks orkumarkaðar í 100 prósent eigu almennings.

Vinstri - grænir gagnrýna að með Landsvirkjun Power sé ekki verið að afmarka áhættu Landsvirkjunar heldur blanda saman verkefnum innan lands og erlendis með tilheyrandi áhættu. „8 milljarða heimanmundur, frá fyrirtæki með ríkisábyrgð á öllum sínum lánum, er settur inn í lokað fyrirtæki sem á að vera í áhætturekstri en hefur um leið með höndum alla rannsóknavinnu, undirbúning og umsjón með framkvæmdum hérlendis," segir í tilkynningu frá Vg.

Vinstri - grænir benda á að vísað hafi verið til stjórnarsáttmála ríkisstjórnarinnar í tengslum við hið nýja fyrirtæki en í honum sé sagt að tímabært sé að leysa úr læðingi krafta einkaframtaksins svo að íslensk sérþekking og hugvit fái notið sín til fulls í útrás orkufyrirtækja. Spyrja Vinstri - grænir hvort túlka beri þetta svo að til standi að hleypa einkafjármagninu inn í framkvæmdir hér innan lands einnig, þar eð LV Power virðist jöfnum höndum eiga að annast verkefni hérlendis og erlendis.

Flokkurinn varar við áformunum sem fyrr segir og vill fá frekari útskýringar á málinu. Lagaumhverfi í orkumálum geti breyst á næstu misserum og spyr flokkurinn hvort tilviljun ráði því að málið sé kynnt um leið og Alþingi hefur lokið störfum fyrir jól. Bendir flokkurinn enn fremur á að vítin séu til að varast þá og vísar þar til til REI-málsins.