Komugjöld til annarra en lækna á göngudeild tekin til greina

Siv Friðleifsdóttir heilbrigðis- og tryggingamálaráðherra hefur breytt reglugerð um hlutdeild sjúkratryggðra í kostnaði vegna heilbrigðisþjónustu. Samkvæmt tilkynningu frá heilbrigðisráðyneytinu felur breytingin í sér að framvegis verða komugjöld á göngudeildunum vegna þjónustu annarra en lækna tekin til greina þegar sótt er um afsláttarkort frá Tryggingastofnun ríkisins, en það var ekki gert áður.

Fyrir breytinguna var gerður greinamunur á því hvort þjónustunnar var leitað á heilsugæslustöð eða á göngudeild sjúkrahúss og var kostnaður þeirra sem sóttu þjónustu til annarra en lækna á göngudeild ekki látinn telja upp í afsláttarskírteini Tryggingastofnunar ríkisins. Þessum mun hefur nú verið eytt.

Samkvæmt nýju reglugerðinni verður almennt gjald þeirra sem hafa afsláttarkort vegna þjónustu annarra en lækna 940 krónur. Ellilífeyrisþegar 70 ára og eldri, örorkulífeyrisþegar, ellilífeyrisþegar 60-70 ára sem nutu örorkulífeyris fram til 67 ára aldurs og ellilífeyrisþegar 60-70 ára sem njóta óskerts ellilífeyris munu hins vegar greiða 450 krónur og börn yngri en 18 ára sem hafa afsláttarkort greiða sömu upphæð.