Áfengisauglýsingar á netinu verða sífellt fyrirferðameiri á netsíðum unglinga, þrátt fyrir blátt bann við slíkum auglýsingum hér á landi. Auglýsingarnar hvetja til drykkju unglinga og eru oftast kvenfjandsamlegar. Þetta kom fram á fundi í Neskirkju í dag um netið og siðferði.
Nokkur íslensk vefsvæði sem börn og unglingar heimsækja mikið eru þakin áfengisauglýsingum. Það sé einkennilegt í ljósi þess að áfengisauglýsingar eru bannaðar hér á landi. Þetta segir Salvör Gissurardóttir lektor í upplýsingafræði og tölvunotkun í Kennaraháskólanum.
Hún segir auglýsingarnar birtist víða, meðal annars á svokölluðum djammsíðum unglinga og markaðssetningin sé oft á tíðum klámfengin.
Salvör sagði í hádegisviðtalinu á Stöð 2 í dag að yfirvöld væru ekki nógu vakandi fyrir netheimum að þessu leiti.Staða þessara mála sé verri hér á landi en í nágrannalöndunum. Þá sé andvaraleysi sé áberandi hér þar sem frelsi unglinga er einnig meira.
Björn Harðarson sálfræðingur segir auglýsingarnar hafa skaðleg áhrif á siðferði barna og unglinga. Hann segir að foreldrar þurfi að endurmennta sig og fylgjast með framvindu í netmálum, því annars sé hætta á að börnin hafi valdið í sínum höndum.
