Óttast um öryggi flugfarþega á Keflavíkurflugvelli

Fækkað hefur um tæplega helming á vöktum slökkviliðsins á Keflavíkurflugvelli frá brotthvarfi hersins. Kæmi upp alvarlegt flugslys á vellinum myndi slökkvilið vallarins einungis hafa mannskap til að berjast við eld utanfrá, ekki bjarga fólki. Þetta segir Borgar Valgeirsson formaður félags slökkviliðsmanna á Keflavíkurflugvelli.

"Við gætum ekki bjargað fólki inni í vélunum án þess að ógna eigin öryggi langt umframþað sem eðlilegt getur talist í slökkvistörfum," segir Borgar og bætir við að samstarfsmenn hans á Keflavíkurflugvelli séu farnir að hafa verulegar áhyggjur af öryggi flugfarþega ef til flugslyss kæmi.

Fulltrúaráð Landssambands slökkviliðs- og sjúkraflutningamanna hefur samþykkt ályktun þar sem lýst er yfir áhyggjum af öryggisviðbúnaði á vellinum. Hann hafi aldrei verið jafn lífill og nú; "öryggi flugfarþega í neyð hefur farið úr því að vera eitt það besta, í eitt það lélegasta," segir í ályktuninni.

Friðþór Eydal upplýsingafulltrúi Flugmálastjórnar á Keflavíkurflugvelli segir fjölda starfsmanna í takt við það sem almennt gerist á sambærilegum flugvöllum í Evrópu. Flugvöllurinn er skilgreindur nr. 9 samkvæmt staðli Alþjóðaflugmálastjórnarinnar og uppfyllir alla öryggisstaðla miðað við þá skilgreiningu. Til stendur að breyta skilgreiningunni niður í 8; "sem er nær raunverulegri flugvélaumferð," segir Friðþór.

Hann segir ekki hægt að bera saman rekstur vallarins frá veru Varnarliðsins. "Hvort mönnum finnst þeir fá minni þjónustu en þegar orustuflugvélar voru vaktaðar hér alla daga er ekki samanburðarhæft."