Hlupu nakin um götur Akureyrar

Gríðarlegt annríki var hjá lögreglu á Akureyri í gær þar sem mikill fjöldi unglinga var í bænum langt fram á morgun. Lögregla segir þó að nóttin hafi gengið vonum framar.

Það var söngkeppni framhaldsskólanna sem laðaði til sín fjölda ungs fólks til Akureyrar um helgina. Eftir að keppninni lauk í Íþróttahöllinni í gær með sigri heimamanna þustu hundruð ef ekki þúsundir ungmenna út á göturnar en dansleikur í höllinni hófst ekki fyrr en klukkan eitt. Lögregla og sjúkralið þurftu að hafa afskipti af sumum vegna ölvunar.

Ungmenni hlupu nakin um götur, ein líkamsárás var kærð, rúða var brotin í íþróttahöllinni og vísbendingar um fleiri skemmdarverk. Þrátt fyrir þetta segir lögreglan að nóttin hafi farið vel fram miðað við aðstæður og langflest ungmennin hafi verið til fyrirmyndar.