Ólafur Ragnar í umræðuþætti um loftlagsmál á CNN

Ólafur Ragnar Grímsson, forseti Íslands, tók í morgun þátt í umræðuþætti á heimsrás CNN þar sem meðal annars var rætt um loftlagsmál.

Þátturinn bar yfirskritina Leiðtogafundur um framtíðina: Björgum jörðinni. Auk forsetans tóku nokkrir af forystumönnum í loftslagsmálum víða að úr veröldinni, sérfræðingar og vísindamenn þátt í umræðunum. Stjórnandi þáttarins var Richard Quest, einn helsti þáttastjórnandi alþjóðaútgáfu CNN.

Í þættinum var rætt um yfirvofandi loftslagsbreytingar, hækkun sjávarborðs, bráðnun jökla, nýja stefnu í orkumálum og nýtingu hreinna orkugjafa, reynslu Íslendinga og þær breytingar sem nauðsynlegt er að gera á efnahagskerfi heimsins.

Fram kemur í tilkynningu frá forsetaembættinu að þátturinn verði endursýndur nokkrum sinnum á heimsrás CNN. Fyrsta endursýningin verður í dag klukkan 18 að íslenskum tíma. Þátturinn verður einnig sýndur klukkan 10 og 19 laugardaginn 22. desember og klukkan 12 og 18 sunnudaginn 23. desember.