Milljónatjón hjá Orkuveitunni í óveðri

Milljónatjón hefur orðið á ljósabúnaði á vegum Orkuveitu Reykjavíkur á höfuðborgarsvæðinu í óveðri undanfarinna daga.

Fram kemur í tilkynningu frá Orkuveitunni að ljósaperur í götuljósum hafi sprungið, ljósastaurar skekkst og jafnvel brotnað og jólaskreytingar fokið út í veður og vind. Hefur Orkuveitan haldið úti fimm körfubílum með áhöfnum til þess að freista þess að sinna viðgerðum en mjög víða eru heilu íbúðar- og umferðargötur ljóslausar eða ljóslitlar.

Unnið er eins hratt og hægt að skapa skapa fullnægjandi öryggi með lýsingu að sögn Orkuveitunnar. Ljóst er að tjónið skiptir milljónum, jafnvel milljónatugum, en það liggur ekki fyrir fyrr en viðgerð hefur farið fram alls staðar.