Bæjarstjóri sparar gífuryrðin

Lögmaður Hveragerðisbæjar kannar nú hvernig lóð í eigu bæjarins komst í eigu manna sem eingöngu áttu byggingarrétt á lóðinni en ekki lóðina sjálfa.

„Við höfum falið okkar lögmanni þetta mál og finnst eðlilegt að bíða hans niðurstöðu og ráðlegginga áður en við komum með gífuryrði í fundargerðum og fjölmiðlum. Við undrumst bókanir og yfirlýsingar minnihlutans á þessu stigi," segir Aldís Hafsteinsdóttir, bæjarstjóri í Hveragerði, sem kveður lögmanninn vinna að því að eignarhald lóðarinnar verði fært í fyrra horf.

„Við teljum ekki eðlilegt að gengið sé frá þessu máli bakvið tjöldin," segir Herdís Þórðardóttir, bæjarfulltrúi minnihlutans í Hveragerði. „Við sem kjörnir fulltrúar þurfum að gæta þess að komist verði til botns í málinu þannig að það verði í minnsta kosti hægt að girða fyrir að það geti gerst að lóðir færist úr einni hönd í aðra án þess að réttmætur eigandi hafi nokkuð um það að segja."

Feðgarnir Guðmundur Sigurðsson og Sigurður Fannar Guðmundsson, sem keyptu byggingarréttinn á umræddri lóð, svokallaðri Tívolílóð í Hveragerði, segja í yfirlýsingu að tilteknar handskrifaðar áritanir sem þeir gerðu á ákveðin skjöl hafi verið gerðar að beiðni þinglýsingastjóra til að tilgreina nánar þá eign sem um var að ræða. Áritanirnar urðu til þess að lóðin sjálf var skráð á feðgana. Yfirlýsing þeirra er birt í heild með þessari frétt á visir.is - gar