Komust úr þyrlunni áður en henni hvolfdi

Flak björgunarþyrlunnar TF-SIFJAR er nú geymt í flugskýli á vegum Rannsóknarnefndar flugslysa (RNF) eftir að því var bjargað í land aðfaranótt þriðjudags. RNF hefur tekið yfir forræði yfir flakinu af Landhelgisgæslunni (LHG) og vinnur að frumrannsókn slyssins. Forstjóri LHG segir gott veður og nálægð björgunarskips hafa skipt sköpum við björgun áhafnarinnar. Áhöfnin komst út úr vélinni áður en henni hvolfdi í sjónum. Eitt flotholt vélarinnar sprakk með þeim afleiðingum að henni hvolfdi.

Þyrlan þurfti að nauðlenda í sjó út af Straumsvík. Fjögurra manna áhöfn bjargaðist, og komst hún úr úr vélinni af eigin rammleik. Orsakir slyssins eru ókunnar en talið er að hún hafi misst vélarafl þar sem hún var að æfingum ásamt Björgunarsveit Hafnarfjarðar. Flugstjórinn neyddist til að lenda þyrlunni í sjónum og var áhöfninni bjargað um borð í björgunarskipið Einar Sigurjónsson, sem var við æfingarnar.

Georg Lárusson, forstjóri Landhelgisgæslunnar, segir að gott veður á slysstað og nálægð björgunarskipsins hafi skipt sköpum í björgun áhafnarinnar. „Til allrar lukku komust þeir líka út úr þyrlunni áður en henni hvolfdi í sjónum. Það er alveg ljóst að reynsla og þjálfun þessara manna varð til þess að þeir brugðust við aðstæðum eins faglega og í mannlegu valdi stóð.“ Georg segir að allar líkur séu á að öll áhöfn vélarinnar komi til fyrri starfa hjá LHG.

Forsvarsmenn Björgunarsveitarinnar í Hafnarfirði telja mikla mildi að hífingar yfir björgunarskipinu stóðu ekki yfir þegar óhappið varð. Um tíu manns voru um borð og hætt hefði verið við slysi á mönnum hefði æfingin verið lengra komin, að þeirra mati.

Sigurður Heiðar Wiium, flugstjóri á TF-SIF, segir að áhöfninni allri líði vel. „Þetta fór allt vel og við erum allir við hestaheilsu. Við erum búnir að tala saman og það verður framhald á því næstu daga.“ Sigurður segir að áhöfnin hafi fengið áfallahjálp fljótlega eftir slysið. „Það er full ástæða til því hver einstaklingur tekur atburðum sem þessum á misjafnan hátt.“

Þorkell Ágústsson, forstöðumaður RNF, segir að vettvangsrannsókn sé að ljúka og þá taki við frumrannsókn. Hljóðriti vélarinnar verður sendur til Bretlands eða Kanada þar sem gögn hans verða lesin.