Handarför á stjörnustéttinni

Þríeykið Daniel Radcliffe, Emma Watson og Rupert Grint, eða Harry, Hermione og Ron, hafa fengið handarför sín fest í steypu rétt við Frægðarstéttina í Hollywood. „Þetta er algjörlega ótrúlegt,“ sagði Radcliffe, sem hefur leikið Harry Potter síðan hann var ellefu ára gamall. „Að vera hérna á meðal nafna eins og John Wayne og allra hinna er rosalegt,“ sagði hann yfir sig hrifinn.

Hin sautján ára Emma Watson sem leikur bókaorminn Hermione Granger sagði þetta vera það merkilegasta sem hún hefði nokkurn tíma gert. Þríeykið hefur leikið í fimm myndum en sú nýjasta er nýkomin í kvikmyndahús. Einnig er sjöunda og síðasta Harry Potter-bókin væntanleg í búðir hinn 21. júlí en sú nefnist Harry Potter and the Deathly Hallows.