Reiknað með metþátttöku í Mýrarboltanum

„Í fyrra voru 260 þátttakendur en við teljum okkur vera illa svikna ef sú tala verður ekki slegin í ár,“ segir Hálfdán Bjarki Hálfdánsson, talsmaður Mýrarboltamótsins sem haldið verður á Ísafirði um verslunarmannahelgina.

Undirbúningur er í fullum gangi og verður leikið á fjórum völlum. Verið er að rífa upp gras og bleyta vel í öllu með aðstoð slökkviliðsins og annarra tækjagóðra einstaklinga sem vilja leggja sitt á vogarskálarnar þannig að mótið takist sem best.

Hálfdán hefur verið útnefndur drullusokkur mótsins sem er einhvers konar framkvæmdastjóri en aðspurður hvort þessi titill væri ekki frekar niðurlægjandi sagði Hálfdán svo ekki vera. Það væri hreinlega fín tilfinning að vera drullusokkur.

Mýrarboltinn sló í gegn á síðasta ári eftir að mótshald hafði farið frekar lágt árin tvö á undan. Og voru myndir frá leikjunum meðal annars notaðar í auglýsingaherferð Vodafone. Enda segir Hálfdán að áhuginn sé mikill og þá ekki síst hjá kvenfólkinu. „Þær leggja mikið uppúr búningum og eiga alveg jafn mikla möguleika á sigri eins og karlarnir,“ segir Hálfdán. Mótið fer fram í Tunguskógi í Skutulsfirði en þar er eini löglegi keppnisvöllurinn í þessari allsérstæðu íþrótt.