Þakklátir staðarhöldurum í Breiðavík

„Við erum þeim hjónum alveg ótrúlega þakklátir og móttökurnar hafa verið bæði hlýlegar og yndislegar,“ segir Egill Helgi Kristinsson, sem situr í stjórn Breiðavíkursamtakanna. Eins og fram kom í Fréttablaðinu í gær eru Íslendingar tregir við að ferðast til Breiðavíkur eftir að upp komst um illa meðferð á unglingsdrengjum þar á 6., .7. og 8. áratugnum. Framar í blaðinu má síðan sjá umfjöllun um heimasíðu sem samtökin hafa stofnað á vefslóðinni breidavikursamtok.is.

Málið vakti mikla athygli í fjölmiðlum á sínum tíma og sagði Keran Stueland Ólason, annar eigandi gistiheimilisins, í samtali við Fréttablaðið í gær að þau hjónin hefðu fundið áþreifanlega fyrir því að íslenskt ferðafólk væri feimið að koma til þeirra. „Þessi staður má alls ekki gleymast og minning hans verður að lifa. Við viljum taka það skýrt fram að við höfum alls ekkert á móti staðnum heldur eingöngu kerfinu sem brást okkur og sumu af því fólki sem þarna braut á okkur,“ bætir Egill við.

Strákarnir frá Breiðavík hafa nú farið þangað saman einu sinni, um hvítasunnuhelgi, og buðu hjónin Keran og Birna Mjöll Atladóttir þeim að gista hjá sér að kostnaðarlausu. Að sögn Egils verður framhald á þessum ferðum. Einnig stendur til að endurgera fangaklefann sem þarna er sem og að endurreisa leiksvæðið en á sínum tíma fékkst aldrei leyfi til að gera það. „Ég hef grátið mikið í gegnum ævina en taldi mig alveg vera hættan því. En þegar ég kom þangað á gistiheimilið til þeirra og sá hversu vel mér gat liðið þarna þá klökknaði ég,“ segir Egill sem vildi hvetja Íslendinga til að gera sér leið vestur og þannig halda minningu staðarins á lofti.