Paris og Lindsay grafa stríðsöxina

Paris Hilton mætti í 21 árs afmæli Lindsay Lohan á Malibu-ströndinni um helgina. Breska blaðið The Sun greindi frá þessu í gær. Þetta þykir tíðindum sæta enda ekki langt síðan glamúrgellurnar voru svarnir óvinir.

Þær höfðu báðar verið áberandi á galeiðunni í Hollywood fyrir um ári síðan og fengið sér einn eða tvo drykki saman. En þegar Lindsay reyndi við unnusta Paris sauð upp úr hjá stúlkunum og þær létu svívirðingar og fúkyrði fjúka hvor um aðra á opinberum vettvangi.

En síðan þá hefur mikið vatn runnið til sjávar. Þær hafa báðar komist í kast við lögin, farið í meðferð eftir sukksamar nætur og sækja nú kirkju af miklum móð. Enda mæla fjölmiðlafulltrúar stjarnanna með því fyrir umbjóðendur sína að eftir að hafa orðið á í messunni sé langbest fyrir þær að finna Guð.

Og fyrirgefningin virðist leika þar stórt hlutverk því vel fór á með þeim í afmælinu og bíða fjölmiðlar nú spenntir eftir því að Britney Spears sláist í hópinn með þeim stöllum.