Vinstri grænir í sókn í Norðvesturkjördæmi

Vinstri hreyfingin - grænt framboð er í mikilli sókn í Norðvesturkjördæmi samkvæmt nýrri könnun sem Félagsvísindastofnun Háskóla Íslands gerði fyrir Stöð 2 og kynnt var á fyrsta kosningafundi Stöðvar 2 í Stykkishólmi í gærkvöldi.

Vinstri grænir bæta við sig rúmum 12% frá síðustu kosningum og mælast með 23 prósent. Aðrir flokkar tapa fylgi og Framsóknarflokkurinn mest, fer úr 22% fylgi í rúmlega 14%. Sjálfstæðisflokkurinn fær 28,4 prósent, Frjálslyndir 9,7, Samfylkingin tæp 21 og I flokkurinn tæp þrjú.

Einnig kemur í ljós að konur kjósa frekar Samfylkinguna og Vinstri græna og munar um 10% á fylgi hvors flokks meðal kynja. Karlar ætla hins vegar að kjósa Frjálslynda og Framsóknarflokkinn í meiri mæli en konur og munar þar 7-8%. Jafnast er hjá Sjálfstæðisflokknum en þar munar aðeins einu prósenti. Samskonar könnun verður gerð kjördæmnum fyrir alla kosningafundi Stöðvar tvö fram að kosningum, en sá næsti verður á Akureyri miðvikudaginn fjórða apríl.