Sanngjörn viðskipti á Laugaveginum

Fyrsta Fair Trade-búðin á Íslandi var opnuð í gær við Laugaveg 20 b. Það eru mæðgurnar Ásdís Ósk Einarsdóttir og Arndís Harpa Einarsdóttir sem reka búðina en Ásdís kynntist Fair Trade fyrst á Nýja Sjálandi. „Ég bjó á Nýja Sjálandi í þrjú ár og dag einn rakst ég á Fair Trade-búð og leist svona rosalega vel á.

Fair Trade er þýtt sem sanngjörn viðskipti af Hjálparstofnun kirkjunnar,“ segir Ásdís sem hefur kynnt sér málefnið vel.

„Fair Trade eru alþjóðleg samtök sem eru með það markmið að auka jafnræði á vinnumarkaðnum. Það sem þarf til þess að fyrirtæki fái vottunarstimpil frá Fair Trade er til dæmis að á vinnustaðnum ríki jafnrétti, þar séu öruggar vinnuaðstæður og ekki meira en átta tíma vinnudagur.

Tilgangurinn er að framleiðendur fái sanngjarnt verð fyrir vöruna en fyrirtæki frá þróunarlöndum þurfa oft að borga fjórfalt hærri tolla og neyðast til að selja vöruna undir kostnaðarverði. Þeir eru þá í rauninni að vinna frítt,“ segir Ásdís og bætir því við að það sé samfélagsleg ábyrgð okkar sem neytendur að versla við réttu fyrirtækin.

Í búð þeirra mæðgna verður ýmislegt á boðstólum og er lögð áhersla á gott verð. „Við verðum með matvöru, te og kaffi, krydd og alls konar sælgæti. Auk þess bjóðum við upp á leikföng, búsáhöld, bolla og skálar, ritföng skartgripi og bara ýmsa spennandi smáhluti sem allir eru á sérlega góðu verði.“