Eddie Murphy er pabbinn

Langri bið Melanie Brown er loks á enda því nýlega var henni tilkynnt að pabbi hinnar þriggja mánaða gömlu Angel Iris væri gamanleikarinn Eddie Murphy.

Breska götublaðið The Sun greinir frá þessu. Eddie Murphy hefur neitað frá fyrsta degi að hann sé pabbi stelpunnar en dómari í Los Angeles skikkaði Eddie í faðernispróf. Niðurstöðurnar bárust fyrir helgi og er Mel B sögð vera í skýjunum með að þetta skuli vera komið á hreint. Náinn vinur Kryddstúlkunnar segir hana reyndar alltaf hafa vitað að Murphy væri faðirinn. „Og henni finnst ótrúlegt að það skuli hafa þurft DNA-próf til að sýna fram á það," hefur The Sun eftir vininum. „Hún er himinlifandi yfir því að sannleikurinn sé kominn í ljós og ætlar að einbeita sér að því að vera mamma."

Mel og Eddie þóttu á sínum tíma nokkuð undarlegt par og kom það fjölmiðlum í opna skjöldu að þau skyldu stinga saman nefjum. Mel varð síðan ólétt eftir nokkurra vikna samband en Adam var ekki lengi í paradís. Eddie hætti með henni í hollenskum sjónvarpsþætti og krafðist þess að fram færi faðernispróf.

Gamanleikarinn lýsti því síðan yfir að ef hann reyndist vera faðirinn myndi hann standa sína plikt. Angel Iris er sjöunda barn Eddie en annað barn Mel sem á stúlkuna Phoenix Chi með Jimmy Gulzar. Samkvæmt The Sun hefur söngkonan verið að hitta kvikmyndaframleiðandann Stephen Belafonte á milli þess sem hún undirbýr endurkomu Spice Girls á föstudaginn í þessari viku.