Paul Potts ætlar í tannréttingar fyrir sigurlaunin

Símasölumaðurinn Paul Potts frá Wales bar sigur úr býtum í Britain"s got talent raunveruleikaþættinum í Bretlandi sem lauk á sunnudagskvöldið.

Hinn 36 ára gamli Potts sló í gegn með flutningi sínum á Nessun Dorma fyrr í þáttaröðinni sem hann síðan endurflutti í sjálfum lokaþættinum.

12,1 milljón Breta stilltu á ITV-sjónvarpsstöðina til að horfa á lokaþáttinn og rúmlega tvær milljónir atkvæða bárust. Svo fór að Potts hafði betur í baráttu við sex aðra keppendur sem fóru alla leið í úrslitaþáttinn, þar á meðal hina sex áru gömlu Conny Talbot sem talin var helsti keppinautur Potts.

„Ég er ennþá að bíða eftir því að einhver klípi mig og segi mér að mig hafi verið að dreyma. Það er ótrúlegt að hugsa til þess að ég hafi unnið keppnina,“ segir Potts, en hann fékk 100 þúsund pund, rúmar 12 milljónir króna, fyrir sigurinn. Hluta af sigurlaununun hyggst hann nota til að borga skuldir en Potts er einnig harðákveðinn í að rétta í sér tennurnar - sem er eitthvað sem hann hefur ekki haft efni á hingað til.

„Svo væri gaman að gera eitthvað fyrir konuna mína. Ætli við förum ekki í Safari-ferð til Afríku,“ segir Potts, en henni kynntist hann á spjallsíðu á internetinu.

Simon Cowell sat í dómnefnd þáttarins og lét hann hafa eftir sér að upptökur á fyrstu plötu Potts myndu hefjast í næstu viku. Jafnframt sagði Cowell að Britain"s got talent væri besti raunveruleikaþáttur sem hann hefði nokkru sinni tekið þátt í. „Paul Potts er ástæðan fyrir því að ég er í svona þáttum,“ sagði Cowell.

Þrátt fyrir sigurinn og miklar væntingar dómnefndar um frægð og frama útilokar Potts ekki að halda starfi sínu hjá Carphone-símafyrirtækinu í Wales. „Ég er í ábyrgðarstöðu á lagernum og fyrirtækið þarf á mér að halda. En ég held að enginn búist samt við mér aftur. Við sjáum hvernig þetta fer á næstu dögum og vikum,“ sagði Potts, ábyrgðin uppmáluð.