Mæðginin taka glöð á móti gestum

Miðborg Reykjavíkur er þekkt fyrir urmulinn allan af kaffihúsum en eitthvað minna hefur farið fyrir þeim á landsbyggðinni. Nú hefur Rúna Esradóttir opnað fyrsta kaffihúsið á Súðavík í félagsheimilinu og það er allt brjálað að gera.

„Ég er að fara kenna í haust og er nýkomin úr barneignarleyfi þannig að mig vantaði eitthvað að gera í sumar,“ segir Rúna Esradóttir. Hún var í óða önn að gera allt klárt fyrir opnun dagsins og sagðist vera bæði stressuð og spennt yfir því hvernig þetta allt ætti eftir að ganga þegar Fréttablaðið náði tali af henni.

Rúna nýtur liðsinnis frá Kaffitár og fær kaffi frá versluninni auk sérstakrar kaffivélar. Þá hyggst hún bjóða uppá lummur og döðlubrauð sem hún bakar sjálf og er að eigin sögn alveg rosalega gott með smjöri. Þar að auki verður boðið uppá flatkökur og sígilda súkkulaðiköku þótt kaffið verði að sjálfsögðu í aðalhlutverki.

„Við notumst við það besta úr kaffibauninni og ég er að reyna finna hinn fullkomna espressobolla. Þetta snýst ekki bara um kveikja á kaffivélinni heldur eru þetta einhvers konar trúarbrögð,“ segir Rúna sem verður þó ekki ein í afgreiðslunni því hún nýtur liðsinnis sonar síns Eldars. „Hann mun blikka viðskiptavinina þegar svo á við úr barnavagninum,“ segir Rúna.

Kaffihúsið er hið fyrsta sinnar tegundar á Súðavík en í bænum má finna veitingastaðinn Jóa Indíafara sem sér um „hefðbundin“ skyndibitamat á borð við hamborgara og pylsur. Og Rúna hyggst ekki bara bjóða uppá kökur og kaffi því hún er að undirbúa sögusýningu um Súðavík sem verður varpað uppá veggi þess með þar til gerðum myndvarpa.

„Og ef ekkert verður að gera og það verður drepleiðinlegt hérna fer ég sennilega útí það að hanna heimasíðu,“ bætir Rúna við. Heimatökin ættu síðan að vera hæg hjá Rúnu ef það skyldi vanta tónlistaratriði en hún er unnusta tónlistarmannsins Arnar Elíasar Guðmundssonar, betur þekktan sem Mugison. „Hann fer nú samt eiginlega bara á sjó þegar platan kemur út, verður bara ekkert heima. En hann mun hjálpa til þegar tími gefst,“ útskýrir Rúna. „Enda er honum varla stætt á öðru,“ segir hún í gríni og skellihlær, bætir því síðan við að fjöldi fólks hafi haft samband við hana og boðist til að leggja henni lið þegar fram líða stundir.