Gubbi Morthens á flottasta bílnum á Stöðvarfirði

Eftir því hefur verið tekið á Stöðvar­firði að nýr bíll er kominn í plássið. Um er að ræða svartan Land Rover Discovery jeppa árgerð 2006 sem var áður í eigu ekki ómerkari manns en Bubba Morthens. Nýi eigandinn er trillusjómaðurinn Guðbjörn Sigurpálsson sem gengur nú undir gælunafninu Gubbi Morthens í bænum.

„Jú, það er rétt, ég keypti bílinn og viðurkenni að það var ekki síst vegna þess að hann var áður í eigu Bubba Morthens,“ segir Guðbjörn í samtali við Fréttablaðið. „Þetta er fínasti bíll en mér fannst þó skrítið að það var búið að keyra hann 16 þúsund kílómetra án þess að setja hann í smurningu. Ég veit ekki hverjum er þar um að kenna, B&L eða Bubba, en það verður að hugsa vel um þessa bíla.“

Guðbjörn vill ekki viður­kenna að hann sé einn af hörðustu aðdáendum Bubba en segist þó hafa gaman af honum. „Hann hefur nú samið mörg góð lögin en ég kunni aldrei við hann í dómarahlutverkinu í Idol-keppninni. Hann er alltof mikill hrokagikkur til að geta dæmt í slíkri keppni,“ segir Guðbjörn og má greina vott af vanþóknun í röddinni.

Ekki hefur Guðbjörn hlustað á Bubba í Land Rovernum eftir að hann festi kaup á bílnum þar sem hann á enga diska með kónginum. „Það fylgdu engir diskar með í kaupunum. Er ekki Sjóvá líka búin að kaupa allt klabbið af honum?“ spyr Guðbjörn.

Það var auðsótt mál fyrir blaðamann að fá Guðbjörn til að stilla sér upp í myndatöku en þó með einu skilyrði. „Ég vil ekki svona „Guðbjörn fallinn“ fyrirsögn. Ég hætti að reykja fyrir þremur árum og er ekki fallinn enn,“ segir Guðbjörn og hlær.