Gómaði bíræfna matarþjófa

Sveinn Kjartansson, matreiðslumeistarinn góðkunni á Fylgifiskum, sýndi mikið hugrekki og dirfsku á föstudaginn þegar hann elti uppi glæpaflokk frá Rússlandi. Þeir höfðu látið greipar sópa í veisluþjónustu staðarins á Suðurlandsbraut og rænt bíl staðarins. „Þetta gæti líka hafa verið heimska,“ segir Sveinn í samtali við Fréttablaðið.

Málavextir voru þeir að Sveinn og kollegar hans hjá Fylgifiskum höfðu verið að útbúa veislu fyrir kvöldið og komu til þess að ganga frá síðustu réttunum. Þegar þeir komu að húsnæðinu á Suðurlandsbrautinni sáu þeir að brotist hafði verið inn og hverjum einasta munnbita stolið. „Við ætluðum auðvitað að bæta þennan skaða, hófumst handa við að búa til nýja rétti en þegar við ætluðum að keyra réttina út uppgötvast að bílnum hafði líka verið stolið,“ útskýrir Sveinn og voru þá góð ráð dýr. „Við hringdum auðvitað bara á lögregluna,“ segir Sveinn.

Þegar starfsfólkið stóð fyrir utan húsnæðið í öngum sínum yfir þjófnaðinum keyrir hins vegar bíll framhjá þeim sem er grunsamlega líkur Fylgifiska-bílnum. Og Sveinn æðir af stað til að sjá hvert hann fer. „Hann svínar fyrir annan bíl og keyrir inn í port sem er þarna skammt hjá,“ segir Sveinn og viðurkennir að honum hafi liðið eins og stórborgarlöggu í bandarískri kvikmynd. „Hjartað tók nokkur aukaslög og „rushið“ lifði langt fram eftir kvöldi,“ segir Sveinn.

„Ég sé hvar bílnum er lagt og út koma tveir strákar. Ég geng bara að þeim og spyr hvað þeir séu að spá,“ segir Sveinn en mikið fát kom á þjófana þegar kokkakrumlurnar náðu taki á þeim. „Ég varð þess þó fljótlega áskynja að þeir voru ekki íslenskumælandi og held að þetta hafi hreinlega bara verið bófagengi sem fer um bæinn og stelur öllu steini léttara,“ segir Sveinn sem bætir því þó við að þegar leitað var að stolna matnum var augljóst að þjófarnir höfðu tekið hraustlega til matar síns. Aðeins einn lítill brauðmoli var eftir af öllum veisluföngunum. „Þannig að kannski verður að líta á þetta rán sem einhvers konar hrós.“