OK! vann Hello!

Breska tímaritið OK! vann dómsmál sem það höfðaði gegn helsta keppinauti sínum Hello! vegna ljósmynda sem Hello! birti úr brúðkaupi leikarahjónanna Michael Douglas og Catherina Zeta-Jones árið 2000.

OK! hafði samið við Douglas og Zeta-Jones um einkarétt á myndunum en þrátt fyrir það birti Hello! „paparazzi“-myndir frá athöfninni.

OK! hafði fengið að mynda brúðkaupsveisluna á Plaza-hótelinu í New York og var stjórnendum þess því ekki skemmt þegar Hello! birti einnig myndir frá veislunni. Töldu þeir Hello! hafa skaðað orðspor sitt með myndbirtingunni.

Douglas og Zeta-Jones höfðu áður höfðað einkamál gegn Hello! fyrir að birta myndirnar og unnu það fyrir dómstólum. Sagðist Zeta hafa liðið hræðilega vegna mynda Hello! og fundist eins og tímaritið hefði ráðist inn í einkalíf sitt með sínum óheppilegu myndum. Fengu þau um tvær milljónir króna í skaðabætur.