Fjölbreytileiki í fyrirrúmi

Óhefðbundna ísfirska fegurðarsamkeppnin Óbeisluð fegurð fer fram á miðvikudagskvöld, og stendur undirbúningur nú sem hæst. „Þetta eru fjórtán keppendur á öllum aldri, eins og við vildum hafa það," sagði Matthildur Helgadóttir, einn skipuleggjandi keppninnar.

Í hópi keppenda er einn Ástrali, Íslendingur búsettur í Noregi, og maður frá Jamaíku. „Hann er búinn að búa hérna svo lengi að hann er bara Ísfirðingur í okkar huga. Hann er með dreadlocks alveg niður á rass, svo það er rosa gaman að hafa hann með," sagði Matthildur.

Í dómnefnd hittast fyrir „gröfukarl og goðsögn", kona sem heimasíðan titlar „móður og norn", hrossaræktandi og viðskiptafræðingurinn Þórey Vilhjálmsdóttir, fyrrverandi formaður V-dagsins á Íslandi og einn stofnenda fegurðarsamkeppninnar ungfruisland.is. Verðlaun í keppninni eru svo jafn fjölbreytt og aðrir þættir hennar. „Fyrsti vinningur verður mjög veglegur, og svo erum við búin að fá fullt af öðrum vinningum. Einn er frá gröfukarli í bænum sem gefur mokstur á bílastæði, dekkjaverkstæði gefur umfelgun, og prestur á svæðinu gefur blessun, svo eitthvað sé nefnt," sagði Matthildur.

Miði á keppnina, sem felur í sér fordrykk og mat, kostar 3.800 krónur, en það er stefna hópsins að aðgangseyrir renni að mestu óskiptur til Sólstafa, systursamtaka Stígamóta á Vestfjörðum. „Þetta eru ný samtök hér á Vestfjörðum og þörfin fyrir fjármagn mikil, því þegar stungið er á svona kýlum kemur fram stór hópur fóks sem hefur orðið fyrir kynferðislegri misnotkun og þarf á aðstoð að halda," sagði Matthildur.

Í keppninni sjálfri koma keppendur síðan til dyranna eins og þeir eru klæddir og kynna sig fyrir dómnefnd og öðrum gestum. „Við setjum þeim engar skorður, ef einhver vill koma í Liverpool-búningnum sínum er það velkomið," sagði Matthildur. „Tónninn verður mjög afslappaður, keppendur þurfa ekkert að svitna þarna uppi á sviði. Það á að vera taumlaus gleði í þessu, og þannig sýnum við líka fram á hvað hinar keppnirnar eru fátæklegar," bætti hún við. Nánari upplýsingar um keppnina og miðasölu má finna á heimasíðunum www.obeislud.it.is og www.untamedbeauty.org.