Krassandi ævisaga Angelinu Jolie

Ævisaga Angelinu Jolie er væntanleg í verslanir ytra eftir mánuð. Leikkonan fer yfir víðan völl í bókinni, sem heitir einfaldlega Angelina Jolie, og talar meðal annars opinskátt um kynlífsreynslu sína og sambandið við Jenny Shimizu.

„Tiltölulega snemma fékk ég áhuga á ólíkum týpum: strákslegum stelpum, stelpulegum strákum. Mér finnst ég kvenleg og karlmannleg. Ég er sjálf með karlmannlega órólega sál," segir leikkonan í bókinni. Þar kemur fram að hún var farin að þreifa fyrir sér í sadó­masókisma í kynlífinu strax fjórtán ára gömul. Þá skiptust Jolie og lagskona hennar á að skera hvor aðra, og kveðst Jolie bæði hafa verið undirgefin og drottnandi í sambandinu.

Jolie kynntist Jenny Shimizu við tökur á myndinni Foxfire og átti við hana samband í mörg ár. Jolie segir í bókinni að það hafi komið sér á óvart þegar hún varð ástfangin af Shimizu. „Ég vildi bara kyssa hana og snerta. Ég uppgötvaði að ég horfði á hana eins og maður," segir Jolie, sem kveðst hafa viljað giftast Shimizu.

Jolie segir að auki frá því þegar hún og Brad Pitt sváfu saman í fyrsta sinn, á strandhóteli í Kenýa. Þegar parið var í miðjum klíðum komu lífverðir þeirra hlaupandi inn í herbergið. Þeir héldu að villidýr hefði ráðist á parið sökum ólátanna sem þaðan bárust.

Samband Jolie við bróður sinn hefur vakið mikið umtal, eins og ósætti hennar við föður sinn, Jon Voight. Ekki er vitað hvort Jolie tjáir sig um þau mál í bókinni.