Afþakkaði afmælisboð

Ragnheiði Hanson, sem skipulagði tónleika Elton John á Laugardalsvelli hinn 1. júní árið 2000, var á dögunum boðið í sextugsafmæli breska tónlistarmannsins Elton John, sem verður haldið í Madison Square Garden í New York í kvöld. Þar mun Elton flytja öll sín þekktustu lög fyrir framan vini sína og vandamenn.

Ragnheiður ákvað að þekkjast ekki boðið en fara þess í stað til Ítalíu í afslöppunarferð. Hún segir Elton hafa verið mjög viðkunnanlegan er hún hitti hann á sínum tíma. „Hann var afskaplega fínn og skemmtilegur. Hann var með húmorinn í lagi og reytti af sér brandarana," segir Ragnheiður. Elton stoppaði stutt við hér á landi og flaug út með einkaflugvél sinni strax eftir tónleikana. Náði hann þó að svala glerlistaráhuga sínum á þeim klukkutímum sem hann hafði aflögu. „Hann hefur greinilega mikinn áhuga á gleri og hann keypti sér eitthvað af gleri og dóti, þannig að hann reyndi að fá eitthvað frá landinu. Síðan sagðist hann vilja koma aftur hingað til að skoða sig um."

Talið berst þá að afmælistónleikum Ólafs Ólafssonar, stjórnarformanns Samskipa, þar sem Elton tróð óvænt upp. „Mér var ekki boðið, því er nú verr og miður. Ég hefði alveg verið til í að mæta," segir Ragnheiður og hlær.

Elton John fæddist í bænum Pinner í Middlesex-sýslu á Englandi. Var hann skírður Reginald Kenneth Dwight en breytti nafninu síðar í Elton Hercules John. Hann hefur gefið út fjölmargar plötur í gegnum tíðina og á meðal þekktustu laga hans eru Crocodile Rock og Candle in the Wind. Ragnheiður segist eiga mörg uppáhaldslög með Elton. „Daniel er æðislegt og líka Someone Saved My Life Tonight. Þessi ferill hans hefur verið alveg æðislegur og hann er frábær tónlistarmaður. Hann er æðislega flottur á tónleikum og spilaði í þrjá klukkutíma hér, sem eru lengstu tónleikar sem hafa verið haldnir á Íslandi. Hann hefur gífurlegt úthald og að spila í þrjá klukkutíma er alveg stórmerkilegt," segir hún.