Gráta næstum á hverjum degi

Tónleikaferð þeirra Eyjólfs Kristjánssonar og Stefáns Hilmarssonar um landið til að kynna plötuna „Nokkrar notalegar ábreiður“ hefur gengið mjög vel.

„Þetta er alveg með ólíkindum. Við förum næstum því að gráta á hverjum degi, við erum svo hrærðir. Stebbi hefur líka aldrei farið í svona ferð og honum finnst þetta mjög gaman,“ segir Eyfi. „Við erum búnir að hitta svo mikið af góðu fólki og við höfum líka spilað í fjórum kirkjum, sem er svolítið nýr vinkill hjá okkur. Okkur finnst það æðislega gaman og þetta hentar okkur vel. Við erum að flytja oft á tíðum viðkvæma tónlist sem þarfnast hlustunar. Í kirkjum hlusta allir,“ segir hann.

„Við spiluðum á Ólafsfirði á veitingastað og þangað mættu 150 manns. Það var ótrúlega góð stemning og fólk hlustaði bara. Við höfum svo mikið verið í prívat giggum og kannski bara verið að spila í hálftíma. Núna er þetta ríflega tveggja tíma dagskrá og við erum að spila kannski 25 lög.“

Tónleikaferð þeirra Eyfa og Stebba er hvergi nærri lokið og framundan er spilamennska í Vestmannaeyjum þann 30. mars og á Selfossi 2. apríl.

Á efnisskrá þeirra félaga eru m.a. Eurovision-lögin sígildu Nína og Ég lifi í draumi. Spurður um nýja Eurovision lagið, Ég les í lófa þínum, segir Eyfi það ekki hafa gripið sig til að byrja með.

„Núna er ég búinn að heyra það nokkrum sinnum og það verður bara betra og betra. Eiki gerir þetta vel, hann er svo góður söngvari og gerir mikið fyrir lagið. Það lekur lífsreynslan úr hverjum tón,“ segir hann og hlær. „Hann er pottþéttur „live“ og það er gaman að einhver svona reynslubolti skuli fara út.“ - fb