Spaugstofan í loftið með þrjúhundruðasta þáttinn

„Já, þetta er mikill áfangi. Sami mannskapurinn frá upphafi. Ég held, án þess að hafa rannsakað það vísindalega, að þetta sé einsdæmi,” segir Pálmi Gestsson, sérlegur blaðafulltrúi Spaugstofunnar.

Mikill áfangi í sögu Spaugstofunnar, og reyndar sjónvarps á Íslandi ef því er að skipta, er nú í uppsiglingu. Á laugardaginn verður 300. þáttur Spaugstofunnar sýndur. Úthaldið er einstakt. Fréttablaðið hefur heimildir fyrir því að erlendir kvikmyndagerðarmenn horfi með furðu til hinnar miklu framleiðni og átti sig engan veginn á því hvernig þetta er hægt. Og áhorfskannanir sýna ítrekað að Spaugstofuþættirnir eru það sem fólk horfir á – Spaugstofan trónir ávallt á toppnum.

Aðspurður segir Pálmi langt því frá að mannskapurinn sé orðinn þreyttur. „Okkur vex ásmegin ef eitthvað er. Við erum rétt að byrja. Eflaust einhverjum til mikillar skelfingar. En vonandi ekki öllum.”

Hópurinn sem skipar Spaugstofuna; Pálmi, Karl Ágúst Úlfsson, Randver Þorláksson, Sigurður Sigurjónsson og Örn Árnason, hefur verið að í þessari mynd frá 1989. En Spaugstofan varð til sem fyrirbæri árið 1985.

Spaugstofumenn eru í virkri stjórnarandstöðu og styðjast við sannfærandi kenningar þess efnis að þannig beri fjölmiðlum að taka sér stöðu. Pálmi segir Spaugstofuna verða beittari með árunum ef eitthvað er. Og nefnir sem dæmi að framsóknarmenn, og einkum fyrrverandi forsætisráðherra, hafi kvartað sáran undan því að ekki hafi verið farið um sig og flokkinn blíðum höndum í þáttunum.

„Persónulega finnst mér við bestir þegar við rýnum í mál sem einhverju skipta, skoðum þjóðþrifamál frá fleiri sjónarhornum en gert er af ráðamönnum. Já, ég tek þetta hlutverk okkar háalvarlega og við mig hafa mætir menn sagt, og það þykir mér vænt um, að við séum eina alvöru gagnrýniröddin í íslenskum fjölmiðlum.”

Margs er að minnast frá löngum og fræknum ferlinum en óneitanlega eru atvik sem hafa náð út fyrir rammann eftirminnilegri en önnur. Eins og þegar Spaugstofan lenti í yfirheyrslum hjá rannsóknarlögreglunni vegna meints guðlasts sem og þegar þeir voru kærðir fyrir klám. „Já, það var eitthvað sem Kristján Ólafsson „pornó dog” hafði viðhaft. En ég get ómögulega nefnt eitthvað eitt umfram annað.”

Spaugstofan bregður ekki út af vananum í tilefni þrjúhundruðasta þáttarins. Heldur sömu virðulegu hógværðinni og jafnan að sögn Pálma.

Ekki hefur enn verið gengið til samninga við Pál Magnússon útvarpsstjóra RÚV ohf. hvað varðar næsta vetur en Spaugstofan hættir í næsta mánuði. Pálmi telur að fyrir liggi vilji beggja aðila að skoða áframhaldandi samstarf. Engan bilbug sé að finna.