Handmáluð hauskúpa

Róbert Stefánsson handmálaði hauskúpu á Mözduna sína með airbrush-tækni. Verkið kallaði á nokkurn undirbúning. Í öðru auga kúpunnar er rautt díóðu-ljós sem bora þurfti fyrir.

Airbrush-menningin náði aldrei að festa rætur hér á landi og eru skrautlega úðaðir bílar eða svokölluð málverk á hjólum fá. Þó hafa nokkrir beitt tækninni á bíla með ágætis árangri og er Róbert Stefánsson einn þeirra. Hann málaði hauskúpu á húdd Mözdu 323 bifreiðar sinnar og tribal-munstur á þakið.

„Ég er mikill áhugamaður um list og er búinn að stúdera airbrushið svolítið. Mig langaði lengi að setja hauskúpu á húddið þannig að ég einfaldlega rissaði upp mynd á húddið og airbrushaði hana svo,“ segir Róbert. „Svo boraði ég gat í annað auga kúpunnar og kom fyrir rauðu ljósi.“

 Málið var hins vegar ekki jafn einfalt og Róbert vill vera láta. Pússa þurfti upp húddið áður en myndin var máluð og lakka þurfti yfir það aftur til að verja myndina og litinn. „Við gerðum þetta inni í bílskúr því það þarf kyrrt loft til að þetta gangi. Við þurftum auðvitað að verja bílinn kringum húddið og það var smá vinna,“ segir Róbert.

Róbert segist hafa mikinn áhuga á að vinna meira með airbrush á bílum. „Ég hef málað á einn annan bíl en það var ekki með airbrush,“ segir Róbert. „Ég er alveg óákveðinn hvort ég geri eitthvað meira við þetta en mig langar að prófa mig áfram og verða betri.“

Airbrush er ekki eina áhugamál Róberts. „Ég hef verið að leika mér á kraftbrettum og svo ákvað ég að gera smá tilraun. Ég tók dekk af mountain-board og setti undir snjóbretti sem ég átti fyrir. Það gefur brettinu skemmtilega eiginleika, það dúar miklu meira en mountain-boardið, og það er allt önnur tilfinning að standa á því,“ segir Róbert. „Það er fínt í brekkurnar en ég verð að viðurkenna að það er full þungt fyrir jafnsléttuna. Maður þyrfti helst að skella mótor undir það til að það gengi.“

tryggvi@frettabladid.is