Listasýning Lynch

Listasýning með verkum eftir leikstjórann David Lynch hefur verið opnuð í Cartier-stofnuninni í París. Sýningin nefnist The Air Is On Fire og þar gefur að líta erótískar ljósmyndir frá nítjándu öld, málverk af limlestum líkömum og ýmislegt fleira óvenjulegt.

Þrátt fyrir að sýningarstjórinn segi verk Lynch vera frekar brengluð segist Lynch sjálfur vera hamingjusamur maður. „Margar af þessum hugmyndum hafa ekkert með gáfur að gera,“ sagði Lynch. „Þetta er meira hugsað sem frumleg svaðilför.“

Mörg verkanna ná aftur til háskólaára Lynch, er hann stundaði listnám í Boston. Á meðal þekktustu kvikmynda hans eru Blue Velvet, Eraserhead, Mulholland Drive og Wild at Heart auk þess sem sjónvarpsþættir hans Twin Peaks nutu töluverðra vinsælda.

Listsýningin stendur til 27. maí næstkomandi.