Krefjast óskoraðs sjálfstæðis Kosovo

Viðræður um framtíð hins umdeilda Kosovo-héraðs í Serbíu hófust í Austurríki í dag. Kosovo-Albanar vilja að héraðið fái fullt og óskorað sjálfstæði en serbneski minnihlutinn hugsar til þess með hryllingi.

Frá því að Atlantshafsbandalagið stóð fyrir loftárásum sínum vorið 1999 hefur Kosovo aðeins að nafninu til verið hluti sambandsríkisins Serbíu og Svarfjallalands . Sameinuðu þjóðirnar hafa í reynd stýrt héraðinu þótt heimamenn hafi skipað ríkisstjórn og löggjafarþing.

Í dag hófust loks viðræður á milli Serba og Kosovo-Albana, undir handleiðslu Sameinuðu þjóðanna, um framtíð Kosovo en þeim hafði verið frestað í síðasta mánuði þegar Ibrahim Rugova,forseti héraðsins,andaðist. Níu af hverjum tíu íbúum Kosovo eru af albönsku bergi brotnu og þeir vilja flestir fullt og óskorað sjálfstæði.

Ise Borovci, Kosovo-Albani, vonast til að viðræðurnar leiði til þess að sjálfstæði Kosovo verði viðurkennt. Kosovo-Albanar hafi þjáðst mikið undanfarin ár og eina lausnin sé að veita þeim fullt sjálfstæði.

Í augum Serba er Kosovo ginnheilagur staður, líkt og Þingvellir eru í hugum Íslendinga, og því geta þeir ekki hugsað sér að missa þar öll völd. Einungis fimm prósent íbúa héraðsins eru Serbar, þeir hafa átt mjög undir högg að sækja á undanförnum árum og eru því svartsýnir á framtíðina.

Stjórnmálaskýrendur telja hins vegar ólíklegt Kosovo fái fullt sjálfstæði á meðan serbnesk yfirvöld eru ekki einu sinni til viðræðu um það. Óvíst er að Kosovo hafi yfirleitt efnahagslega burði til að standa undir sér og auk þess má búast við að slíkt mætti andstöðu í alþjóðasamfélaginu, til dæmis á meðal Rússa, sem þá þyrftu að sýna kröfum tsjetsjenskra aðskilnaðarsinna meiri skilning.

Viðræður næstu daga munu að líkindum fremur snúast um hvernig tryggja má stöðu og réttindi serbneska minnihlutans í héraði sem áfram mun verða hluti af Serbíu í orði en ekki á borði.