Bin Laden segist ekki verða tekinn höndum lifandi

Osama bin Laden, leiðtogi al Kaída hryðjuverkasamtakanna, heitir því að hann verði aldrei tekinn höndum lifandi og segir Bandaríkjamenn hafa gripið til sömu villimannslegu úrræðanna í Írak og Saddam Hussein, fyrrverandi Íraksforseti.

Þetta kemur fram í hljóðupptöku sem birt var á vefsíðu herskárra samtaka í morgun. Svo virðist sem nýja upptakan sé lengri útgáfa af annarri sem spiluð var á arabísku sjónvarpsstöðinni Al-Jazeera í síðasta mánuði.

Þar bauð bin Laden Bandaríkjamönnum vopnahlé en hét um leið nýjum hryðjuverkaárásum á Bandaríkin. Bandaríska leyniþjónustan, CIA, hefur staðfest að það sé rödd bin Ladens sem heyrist á upptökunni.