Telur Mladic enn ganga lausan

Carla Del Ponte, aðalsaksóknari við stríðsglæpadómstól Sameinuðu þjóðanna í Haag segist viss um að Ratko Mladic, fyrrverandi hershöfðingi Bosníu-Serba, gangi enn laus einhvers staðar í Serbíu. Del Ponte skoraði á Evrópusambandið að þrýsta á Serba að góma Mladic en aðild þeirra að Evrópusambandinu veltur á að þeir handsami þá stríðsglæpamenn sem ennþá leika lausum hala. Sú saga gekk fjöllunum hærra í gær að búið væri að handtaka Mladic og í dag hafa serbneskir embættismenn staðhæft að verið sé að semja við hann um að gefa sig fram en þarlend stjórnvöld fást þó ekki til að staðfesta það opinberlega.