Rúm fyrir álver og stækkun

Forsætisráðherra gaf lítið fyrir hvatningar stjórnarandstæðinga um hægja á uppbyggingu álvera á Alþingi í dag. Hann sagði álver á Húsavík og stækkun í Straumsvík rúmast innan marka Kyoto bókunarinnar en efast um að orka fáist fyrir álver á Reykjanesi.

Ánægjan með staðarval Alcoa fyrir hugsanlega álversbyggingu var ekki jafn útbreidd á Alþingi í dag og hún var á Húsavík í gær. Ögmundur Jónasson fór hörðum orðum um stóriðjustefnu stjórnvalda. Hann gagnrýndi eftirlátssemi við erlend álfyrirtæki og sagði grafið undan öðru atvinnulífi með uppbyggingu álvera auk þess sem blikur væru á lofti í efnahagsmálum.

Halldór Ásgrímsson forsætisráðherra deildi ekki áhyggjum þingmannsins. Hann sagði gott að hafa í huga að ef yrði af framkvæmdum á Húsavík og í Straumsvík þýddi það 2.000 til 2.500 ný störf, og fimm til sex prósentum meiri hagvöxt en ella, það væru varla slæm tíðindi fyrir íslenskt efnahagslíf.

Ingibjörg Sólrún Gísladóttir, formaður Samfylkingar, sagði að af þeim stöðum sem hefðu komið til greina í vali Alcoa væri valið á Húsavík í sjálfu sér skynsamlegt. Hún sagði þó aðalatriðið að nú ætti að gera hlé á byggingu nýrra álvera og stækkun þeirra sem eru fyrir þar til farið hefði fram ítarleg könnun á kostum þeirra og göllum. Síðan ætti að velja þann kost sem væri bestur fyrir Íslendinga.

Pétur Bjarnson, þingmaður Frjálslynda flokksins, var ekki í miklum vafa um hvers vegna Húsvíkingar fögnuðu. Hann sagði ástæðuna þá að atvinnulíf á landsbyggðinni hefði grotnað niður í stjórnartíð Sjálfstæðisflokks og Framsóknarflokks og spurði hvort lausnin ætti að vera að byggja álver út um allt land.