Íslendingar ljúki háskólagráðum á svipuðum tíma og aðrir

Prófessor í uppeldis- og menntunarfræði við Háskóla Íslands segir það ekki alls kostar rétt að íslenskir nemendur ljúki námi seinna og skili sér seinna út á vinnumarkaðinn en jafnaldrar þeirra í nágrannalöndunum, eins og haldið hefur verið fram. Íslensk ungmenni ljúki almennt stúdentsprófi seinna en jafnaldrar þeirra í nágrannalöndunum en ef menn skoði sambærilegar gráður á háskólastigi þá ljúki Íslendingar þeim gráðum á svipuðum tíma.

Samfylkingin efndi í gær til opins fundar um styttingu náms til stúdentsprófs, en skiptar skoðanir hafa verið um þær fyrirætlanir stjórnvalda. Einn af fyrirlesurum á fundinum var Jón Torfi Jónasson, prófessor í uppeldis- og kennslufræðum við Háskóla Íslands. Hann hefur unnið að samanburði á skólakerfum Danmerkur, Íslands og Svíþjóðar í tengslum við hugmyndir um styttingu námstíma til stúdentsprófs.

Jón Torfi segir vissulega rétt að íslensk ungmenni ljúki almennt stúdentsprófi seinna en jafnaldrar þeirra í löndunum tveimur. Aftur á móti megi ekki gleyma því að stúdentsprófið sé bara skref í átt að næsta pakka, þ.e. háskólastiginu. Ef menn skoði sambærilegar gráður á háskólastigi, þriggja ára gráður, þá sé eins og þetta hafi leiðrést. Íslendingar ljúki þeim gráðum á svipuðum tíma og Danir og Svíar. Þá megi segja að sá munur sem hafi verið fyrir hendi hverfi.

Jón Torfi segir þó að breytingar séu að verða hér á landi frá þriggja ára kerfi í háskólum á þann hátt að fleiri ljúki fimm ára námi. Hann telur mikilvægt í þessu sambandi að horfa á heildarmyndina, þ.e. nám frá grunnskóla til háskólans en ekki bara fram að framhaldsskóla.

Aðspurður hvað honum finnist um að námstími til stúdentsprófs sé styttur í þeirri viðleitni að fá fólk fyrr út á vinnumarkaðinn segir Jón Torfi að honum finnst ekki aðalatriðið að koma fólki út á vinnumarkaðinn. Spurningin sé hvað fólk sé með í farteskinu. Þar hafi hann svolitlar áhyggjur af breytingunum því honum finnist framhaldsskólinn hafa gefið mjög breiðan og sterkan lamennan grunn. Jón Torfi segir enn fremur að þegar komið sé að tæknilegum útfærslum á hugmyndum um styttingu námstímans hafi hann vissar efasemdir um titlekin atriði en hann geti ekki betur séð en verið sé að ræða það hver útfærslan eigi að vera nákvæmlega og hann hafi ekki miklar áhyggjur af því að menn komist að sæmilega góðri sátt um það.