Sér ekki fyrir endann á verkefnum björgunarsveita

Allt innanlandsflug lá niðri eftir hádegi í dag og miklar tafir voru á Keflavíkurflugvelli vegna hvassviðris. Björgunarsveitir á Suðvesturhorninu hafa farið í fjölmörg óveðursútköll í dag og sér ekki fyrir endann á verkefnunum.

Það er til marks um rokið á Keflavíkurflugvelli í eftirmiðdaginn að 400 tonna fraktvél snerist á staðnum, um einar 35 gráður á vellinum um fjögurleytið í dag. Ekki er nú hægt að nota landganga flugstöðvarinnar þar sem í vindhviðum slær upp fyrir 30 metra á sekúndu og hafa því orðið talsverðar tafir á millilandaflugi. Þá leist flugstjóra British Airways ekki meira en svo á blikuna að hann lenti flugvél frá Lundúnum á Egilsstöðum og bíður átekta þar.

Lundúnaflug á Heathrow og Gatwick flugvöllum hefur þar að auki orðið fyrir töfum vegna þykkrar þoku í Lundúnum annan daginn í röð og hefur allt innanlandsflug í Bretlandi verið fellt niður fyrir daginn í dag og morgundaginn. Einnig hefur verið fellt niður allt flug á styttri vegalengdum innan Evrópu. Flugvélar frá Íslandi hafa hins vegar getað lent í London þó einhverjar tafir hafi orðið.

Björgunarsveitir standa í ströngu víða á suðvesturhorninu þessa stundina og er ekki útlit fyrir að lægi þar fyrr en með morgninum. Stærsta verkefnið hingað til hefur verið í Keflavík, þar sem allt tiltækt lið Björgunarsveitarinnar Suðurnesja var kallað að stórri skemmu sem verið er að byggja í iðnaðarhverfinu.

Þá var Björgunarsveitin Mannbjörg frá Þorlákshöfn kölluð út til að festa þakplötur á Fiskimjölsverksmiðju við höfnina í Þorlákshöfn. Björgunarsveitir hafa einnig verið kallaðar út á höfuðborgarsvæðinu og hafa þær fengið allt frá hefðbundnum þakplötuverkefnum að jólatrjám á ferð og flugi.

Allt innanlandsflug hefur legið niðri eftir hádegi og morguninn fór að miklu leyti í að vinna upp flugtafir gærdagsins. Því má búast við að örtröð verði á flugvöllum á morgun þegar lægir, enda margir sem vilja komast heim um jólin eða burt í jólafrí.